АЛТЫНОРДА
Новости

Үкімет жастар саясатының жаңа жобасын қабылдады

Нұрғиса ЕЛЕУБЕКОВ (фото)

Кеше ел Үкіметі 2020 жылға дейінгі ҚР Мемле­кет­тік жастар саясаты тұ­жы­рымдамасының жо­ба­сын мақұлдады. Ми­нистр Бақытжан Жұ­мағұловтың сөзіне сенсек, осы­дан бастап мемлекет жастар­дың бар­лы­ғына бірдей жағдай жа­сайд­ы. Бірақ ол мүмкін­дік­ті қалт жібермей, тиімді пайда­ла­на білу ке­рек. Ал жастар ұйымдары «ұран­шыл» бастамаларын қо­йып, нақты іске кірісуі шарт.

Үкімет мүшелері алдында баяндама жасаған Б.Жұмағұлов мырза атап көрсет­кендей, бұл құжат әлеуметтік саясаттың жаңа принциптеріне, яғни мемлекет ұсынған мүмкіндіктерге ғана емес, әр аза­маттың жеке жауапкершілігіне негізделген. «Мемлекет жастарды жұмысқа орналас­ты­руға, оларды оқытуға және қайта даяр­лау­ға, қолжетімді баспанамен қамтамасыз етуге, жол жүру мен тамақтануға субсидия бөлуге бағытталған шаралар қабылдайды. Бұл ретте, мемлекеттің басты міндеті – жастардың бастамаларына қолдау көрсету, өз мақсаттарына жету үшін мүмкіндік беру. Ал жастардың міндеті – берілген мүмкін­дік­терді дұрыс пайдалана білу», – дейді министр. Оны прагматизм арқылы іске асыру жоспарланған. Бұл дегеніміз жастар саясатындағы әрбір салым қайтарымды және пайдалы болуы шарт. Ағымдағы жы­лы жастар саясатын іске асыруға рес­пуб­ликалық бюджетте 1,5 млрд теңге, оның ішінде мемлекеттік тапсырыс бойынша 590 млн теңге қарастырылған. Сондай-ақ жергілікті бюджеттерден 2 млрд теңге, оның ішінде мемлекеттік тапсырыс бойын­ша 940 млн теңге бөлінбек. Мұның бәрі әлеу­меттік маңызы бар жобаларды көптеп іске асыруға мүмкіндік береді.

Министрдің айтуынша, жаңа тұжырым­даманың негізгі ерекшелігі – ол білім алып жүрген жастарды ғана емес, жұмыс істей­тін, өзін-өзі жұмыспен қамтыған, жұмыс­сыз, маргиналды және тағы басқа жастар топтарын қамтиды. Бүгінде ол үшін қала мен аудан орталықтарында ресурстық ор­та­лықтар құрылуда, ал ауылдық жер­лер­де жастармен жұмыс істейтін инструкторлар болады. Осының арқасында жастармен тіке­лей жұмыс жасауға мүмкіндік бар. «Қазір­дің өзінде жастар саясатының жаңа инфрақұрылымы қалыптасып келеді. Жас­тар ісі комитеттері, аймақтарда тиісті басқармалар құрылды. Жастар саясаты бойынша аймақтық кеңестерді әкімдер тікелей өздері басқарады. Басты бағыт – жастар ұйымдарын шоғырландыру. Қазіргі уақытта олардың саны 1000-нан асады. Біз олардың негізгілерімен жұмыс жүргізіп жатырмыз. Жастар саясатын жүргізуде басты рөл «Жас Ұлан» балалар мен жасөс­пірімдер ұйымына беріледі. Біз 2020 жылға дейін 11 Республикалық жастар ұйы­мын дамыту стратегиясын әзірледік. Енді олардың филиалдық желілерін дамы­татын боламыз. Сонымен қатар аймақтық ұйымдарға қолдау көрсетіп, жастардың әлеуметтік бағдарламалар мен мем­лекеттік тапсырыстарға қатысуына жағдай жасай­мыз», – деп атап көрсетті Б.Жұмағұл­ов.

Жалпы, Мемлекеттік жастар саясаты тұжырымдамасын екі кезең бойынша іске асыру жоспарланған. Олар – 2013-2015 және 2015-2020 жылдар. Болжамға сәй­кес, тұжырымдаманы іске асырудың бірін­ші кезеңінде ведомствоаралық өзара бай­ланыс­тың тиімді моделі қалыптасады. Ол жастардың проблемасын шешуде бар­лық мемлекеттік органдардың, корпора­тивті секторлар мен азаматтық қоғам инсти­туттарының күшін біріктіруге мүмкін­дік бермек. Жастармен жұмыс жасау міндеті бар­лық мемлекеттік органдардың страте­гия­лық жоспарларына енгізіледі. Тұжырым­даманы табысты іске асыру үшін мүдделі мем­лекеттік органдармен бірлесіп іс-шара­лар жоспары әзірленіп жатыр. Ол да Үкімет­тің талқылауына енгізілетін бола­ды.

Автор: Арман АСҚАР

http://alashainasy.kz