АЛТЫНОРДА
Новости Казахстана

[:kz]Тоқаев келеді: Кәлпе ауылы қызу дайындық үстінде[:]

[:kz]

 

Кремльдің қожайыны Владимир ПУТИН Қазақстанның екінші президенті Қасым-Жомарт ТОҚАЕВТЫҢ алдынан өзі шығып қонақжайлық танытпаса да, мемлекет басшысының атақонысы – Кәлпе ауылы қызу дайындық үстінде екен.

Президент ретінде алғашқы ресми сапарын Мәскеуге жасаған президент Тоқаевты «Внукова» әуежайында тым құрығанда сыртқы істер министрі Сергей ЛАВРОВТЫҢ өзі қарсы алмаған еді. Алайда, Алматы облысы, Қаратал ауданына қарасты Кәлпе халқы өзінің жерлестері деп есептейтін Қасым-Жомарт Кемелұлының келуіне дайындықты бастап кетіпті. Бұл ауылда президенттің әкесі Кемел ТОҚАЕВ дүниеге келген.

Президентті атажұртына  сәуірдің 8-де келеді деп естіген кәлпеліктер аулаларын тазалап, абаттандыру жұмыстарын  бастаған екен.

«Ауылға бастық, шенеуніктер келгенде жол жөнделіп ауыл тазаланады. Өзіме президент келеді деп ешкім хабарлаған жоқ. Дегенмен субботникке шығыңдар, Тоқаев келейін деп жатыр деген әңгіме болды.   Бірақ, мен тазалап жатқан жер өзім жұмыс істейтін дәрігерлік амбулаторияның ауласы ғой. Сондықтан, ол келмесе де тазалауым керек», — дейді Кәлпе тұрғыны Берік ЕСІМБЕКОВ.

«Барлық жаңалықты таксистерден естиміз ғой. Маған олар 8-де келеді деп айтты. Негізі жол жөнделіп, жаппай ауылды тазартып жатқанына қарағанда Тоқаев келетін сияқты», — дейді тағы бір ауыл тұрғыны Қуатбек ТӨКЕН.

Қазір Кәлпе ауылына кіретін негізгі жолдың құрылысын Талдықорған қаласынан келген мердігер компания қолға алған екен. 30-дан астам адам мен бірнеше ауыр техника көшедегі жолдарды жамап, асфальт төсеп жатыр.

Тоқаев келуі мүмкін деген хабарды ауыл әкіміне облыс басшысының орынбасары Серікжан БЕСКЕМПІРОВ айтқан екен. Ауа-райы қолайлы болса президентке қант қызылшасы егілетін алқаптарды көрсетуді жоспарлаған көрінеді. Ауыл әкімінің айтуынша, президент аралайтын егістік алаңы да дайын екен.

«Нақты қай кезде келетінін ешкім айтпады. Бірақ сәуірдің сегізі күні келеді деген хабар бар. Соған орай  ауылда ағаш кесу, ақтау, сырлау жұмыстарын бастап кеттік. Бір сөзбен айтқанда санитарлық тазалық жұмыстарын жүргізіп жатырмыз. Ал, жол жөндеп жатқан мердігерлер былтыр аяқай алмай кеткен жұмыстарын жалғастырып жатыр. Тоқаевтың сапарына оның еш қатысы жоқ»,- Жолбарыс батыр ауылдық округінің әкімі Сержан АНДАСБАЕВ.

Екі  апта бұрын (наурыздың 20-сы күні ) Қасым-Жомарт Тоқаев уақытша президент болып тағайындалған кезде  Жас АЛАШ тілшісі мемлекет басшысының атажұрты Кәлпе ауылына арнайы барып қайтқан болатын. Ол кезде ауыл әкімінің кабинетіндегі президент портретіне арналған орын бос болған. Қазір онда тұңғыш президент Нұрсұлтан НАЗАРБАЕВТЫҢ суреті тұр.

Фотолар автордікі.

 

 Жас АЛАШ 

[:]