[:kz]
Таяуда Пентагон Қытай өзінің ядролық арсеналын көбейтуді жоспарлап отырғанын мәлімдеді. Екі ел арасындағы дағдарыс ресми Бейжіңді осындай қадам жасауға итермелеп отырған тәрізді.
Өткен аптада Пентагон АҚШ Конгресінде жылдық баяндама жасап, Қытайдың ядролық арсеналындағы қару саны 200-ге жетпейтінін мәлім етті. Бірақ бұл елдегі ядролық қару саны әлдеқайда көп болуы ықтимал. АҚШ-тың шенді офицерлері бұл елдегі шикізат қоры ядролық арсенал санын екі еселеуге жетеді деп есептейді. Сондай-ақ оқтұмсықтарды жерден де, судан да, әуеден де атуға күш салмақ. Пентагонның да дабыл қағып отырғаны осы. Жыл басында «Global Times» газеті Бейжің билігі жақын арада оқтұмсықтар санын мыңға көбейтуге әзір деп ақпарат таратқан-ды. Сонымен қатар әуе-су-жер үштігіне де басымдық беруді көздейді. Бүгінде жерден және судан баллистикалық зымыран ұшыруға қабілетті. Ендігі жетпей тұрғаны – әуе арқылы баллистикалық ракета жіберу. Дегенмен былтырғы қазан айында Қытай билігі H-6N бомба тасығыш зымыранын таныстырған болатын.
Келер жылғы ақпанда «The New START» деп аталатын стратегиялық шабуылдау бағытында қарулануды болдырмау жөніндегі Ресей мен АҚШ арасындағы келісімнің мерзімі аяқталады. Естеріңізге сала кетейік, «The New START» шартына 2010 жылы осы екі елдің сол кездегі басшылары Барак Обама мен Дмитрий Медведев қол қойған еді.
Соған сәйкес, оқтұмсықтар саны 1550-ге дейін, құрлықаралық баллистикалық зымырандар, сүңгуір қайықтардағы баллистикалық зымырандар және ауыр бомбалаушылар саны 700 данаға дейін қысқартылуы тиіс. Ал Қытай негізі ядролық қаруды таратпау жөніндегі ешқандай келісімге мүше емес. Осыған байланысты ресми Вашингтон АҚШ пен Ресей арасындағы ядролық қаруға қатысты келісімге Қытайды да кіргізуді көздейді. Әйтсе де, срапшылардың пікірінше мұндайға Си Цзинпинь әкімшілігінің көнуі екіталай.
Дегенмен, коммунистік партия өкілінің бірі сұхбаттарының бірінде АҚШ оқтұмсықтар санын едәуір қысқартса ғана Бейжің билігі келісім үстеліне отыруы мүмкін деген сыңайда әңгіме айтқан. Пентагон бекерге қауіптеніп отырған жоқ.
Таяуда Қытай басшысы Си Цзиньпин ұлттық қорғаныс пен қарулы күштерді жаңғыртуға және дамытуға басымдық беретінін мәлімдеген. Оның айтуынша, қытайлық келбетті сақтап, ұлттық құндылықты нығайту үшін дамумен бірге қорғаныс саласына да көңіл бөлінуі тиіс.
Сондықтан мемлекеттің келешегін айқындау мақсатында әскер саласын күшейтпек. Яғни жаңа бағытқа қадам басып, әскерін әлемдік деңгейге шығаруға күш салмақ. Алдағы жоспар бойынша ұлттық қорғаныс пен қарулы күштерді дамытуға бағытталған жаңа стратегия 14 жылға арналған.
Осы бағдарлама аясында кәсіби әскер құруға басымдық беріледі. АҚШ-та қарап отырған жоқ.
The Washington Post газеті АҚШ президенті Дональд Трамп Невададағы ядролық сынақ алаңын қайта жандандыруға ниетті екенін жеткізген. Сондай-ақ, АҚШ президентінің қарулану жөніндегі арнайы өкілі Маршал Биллингсли елдің қарсыластарын кез келген сәтте тұқыртып, атом бомбасын тастауға әзір екенін мәлімдеді.
Ақпарат құралдарының мәліметіне қарағанда, келер жылы Ақ үй ядролық қаруға арналған бюджет қаржысын 37,3 млрд доллардан 44,5 млрд долларға көбейтуді жоспарлап отыр.
[:]
