Қазақстан Жазушылар одағы жанынан «Қаламгер» атты халықаралық ақпараттық, танымдық-талдамалық, көркем-әдеби журналының тұңғыш саны жарық көрді.
Журналдың, бас үйлестірушісі – Қазақстан Жастар одағы «Серпер» сыйлығының иегері, жазушы-аудармашы Мәлік Отарбаев. Бас редакторы – ақын Кәдірбек Құныпия. 64 беттік журнал айына бір рет шығып тұрады. Жаңа басылым Қазақстан Жазушылар одағы басқармасының төрағасы, Мемлекеттік сыйлықтың иегері Нұрлан Оразалиннің ақ жол тілеген құттықтау сөзімен ашылған. «Күретамыр» айдарымен Абай өлеңдері, «Алтын қалам» айдарымен Мұхтар Әуезовтің «Қаралы сұлу» әңгімесі, «Алтын көпір» айдарымен Пушкин өлеңдерінің қазақша аудармасы, «Тағылым» айдарымен америкалық жазушы Уильям Фолкнердің Нобель сыйлығын алғанда сөйлеген сөзі берілген. Сондай-ақ журналдың тұңғыш санынан Мұрат Әуезовпен, жазушы Берік Шахановпен болған сұхбаттарды, Фариза Оңғарсынованың өлеңдерін, Қоғабай Сәрсекеевтің Бауыржан батыр жайлы естелігін, Шерхан Мұртазаның «Сол бір күз» атты әңгімесін, жазушы Нұрғали Ораздың «Қазығұрт оқиғалары» кітабы жайында жазылған әдеби сын мақалаларын оқуға болады. Ақын Ұлықбек Есдәулет айтқандай, «Жаңа заманның жаңа әдебиетінің жаршысы, талғам таразысына айналуы тиісті жаңа басылымға» ақ жол тілейміз.
Төре ҒАЛИ
http://www.aikyn.kz