Алматыдағы 28 панфиловшы-батырлар атындағы саябақтағы атақты ескерткіштің қабырғасына жазылған естелікке өзгеріс енгізілуі мүмкін. Қалалық ардагерлер кеңесі осындай ұсыныс жасады.
Кеңестің төрағасы Еренғайып Шайхутдинов:
«Ресей – кең-байтақ, бірақ шегінерге жер жоқ – артымызда Москва» деген саяси жетекші Василий Клочковтың атақты сөзіне жалғау ретінде «Отан үшін шайқасқан қазақстандықтардың ерлігін мәңгілік есте сақтаймыз» деген сөйлемді қосу керек. Осы арқылы біз Ұлы Отан соғысына қатысқан жерлестеріміздің жанқиярлық ерлігін мәңгілік есте ұстайтын боламыз» дейді.
Әрине, көтеріліп отырған мәселе өте орынды.
Өйткені жау Ресейге ғана қауіп төндірмегені белгілі. Ол кезде Отан ортақ еді. Қылышын сүйретіп шекарадан енген жауға қарсы тұру, сол ортақ Отанның барлық азаматтарының парызы болды. Қазақстаннан 1 жарым миллионға жуық адам соғысқа аттанды. Бірақ олардың ерлігі дәріптеліп жатыр ма? Тіпті кеңес заманында орталық саябаққа қойылған атақты ескерткіште де «Ресей – кең-байтақ, бірақ шегінерге жер жоқ – артымызда Москва» деп жазылып, соғыс тек Ресейге ғана бағытталғандай етіп көрсетілген. Ал қанды қасапқа қатысқан қазақстандықтар жайлы бір ауыз сөз жоқ. Осы әділетсіздікті жоятын кез келді.
Темірлан Баязит
http://www.aikyn.kz
