Sorry, this entry is only available in Казахский For the sake of viewer convenience, the content is shown below in the alternative language. You may click the link to switch the active language.

Бірінші мамыр – Қазақстан халқының бірлігі күні қарсаңында «Танымал тұлғаны таңдаңыз!» деген атпен бәйге ұйымдастырған едік. 

Бұған себеп, Қазақстан халқы ассамблеясында Елбасы Нұрсұлтан Назарбаев айтқан«XXI ғасырдың ең басты заңы – татулық екендігін» көрсеткен жүрекжарды пікірі еді.

«Келісім – экономика мен саясаттың қауіпсіздігіндегі өмір­дің заңы. Біз келісім мәдениетін дәстүр ретінде ұрпаққа мұра етуге тиіспіз. Келісім мәдениеті мәң­гі­лік болуы керек» деген Елбасы сөзі баршаның жадында ұдайы жүретін жағдай.

Халықтар достығы мен бірлігі жолында Ассамблея мүшелері, ұлттық орталықтар барынша же­місті жұмыс істеп келеді. Әсіресе, жекелеген азаматтар төңірегінде тамаша пікір қалыптасып, мем­лекет мақтанышына айнала бас­таған тұлғалар өсіп шықты. Олар мемлекеттік тілде өздерінің туған тіліндей сөйлеп, елдің рухын көтеруге атсалысуда. Алайда сол азаматтардың арасынан кімді ерекше бөле-жара атауға болады?

Осы сұрақ «Айқын» газеті мен басылымның электронды нұсқа­сындағы әлеуметтік желілерге кіретін оқырмандарды үнсіз қал­дырмапты. Олар «өз мүддесінен мемлекет мүддесін жоғары қоя­тын, ақылы-парасаты бір бойына жарасқан, өзгелерге үлгі етерлік қай ұлт азаматының қоғамдағы рөлін жоғары бағалар едіңіз?» деген сауалға жауап беру бары­сында ұлт жанашыры Асылы Османды Еркін еліміздің елеулі азаматы ретінде танитындық­тарын айтып, ең көп дауыс берген.

Кеше қазақтың аяулы қызы – «Ерке Нұр» компаниясының бас­шысы, Мәдениет саласының үздігі, Қазақстанның еңбек сіңір­ген қай­раткері Фарида Мерха­мит­қызы Асылы Осман апайы­мызды арнайы қонаққа шақырып, редакция ұжы­мы атынан сый-сияпат жасады.

– Мен қазақ халқының қан­ша­лықты қасірет шеккенін жақсы білемін. Бұл ұлт сонда да рухын тү­сірмеді, өзгелерден көмегін аямады. Қазақ халқы тәуелсіздігін ту етіп көтергенде, біз – өзге ұлт өкілдері де қарап қалмай, мемлекет мүддесін барлық жағынан қор­ғауымыз да, қолдауымыз да қажет. Ал мен Қазақстанның таңдаулы адамы, ұлт жанашыры ретінде сенім білдірген барша жұртқа тек жақсылық тілеймін. Қазақ жұрты­на бұған дейін де адал қызмет еткенмін, алдағы өмірімді де ұлт рухын көтеруге арнаймын, – деді Асылы апай әңгіме арасында.

–Асылы апамыз шын мәнінде, ұлт, тіл жанашыры. Мұны бүкіл Қазақстан халқы білетіндігін «Айқын» газеті жариялаған бәйге барысында байқадық, көз жет­кіздiк. Халық бұл кісіге жанашыр болды, қолдады. Біз де қарап қал­май, қазақ үшін ештеңеден та­йынбайтын тұлғаға сый-сияпат жа­сағанды жөн көрдік.

Сүйікті апайымыздың елімізде танымал тұлға екендігіне тағы да көз жеткіздік. Ол кісіге ұзақ ғұ­мыр, бақытты өмір тілеп, ел үшін ең­бек ете беруіне тілектеспіз.

Ал осындай баянды бастама кө­терген Алаш жұртының ардақты газеті «Айқынның» ұжымына шы­ғармашылық табыс тілеймін! – дедi «Ерке Нұр» компаниясының басшысы Фарида Мерхамитқызы.

Иә, мемлекет мақтанышына айналғанға не жетсін! Біз де Асы­лыдай асыл аналардың көбейе бер­генін қалаймыз.

http://www.aikyn.kz/articles/view/48362

Рубрика: