Sorry, this entry is only available in Казахский For the sake of viewer convenience, the content is shown below in the alternative language. You may click the link to switch the active language.

Бүгін сіздермен Еуразияның жүрегінен орын тепкен елордамыз Астана қаласының сол жағалауында орналасқан әлемдік сәулет өнерінің кестесінен орын алып үлгерген тамаша өнер туындысы — «Хан шатыр» ойын-сауық орталығы туралы әңгімелейтін боламыз.

Америка, Біріккен Араб Әмірліктері, Италия жерінде есімі дүние кеңінен танылған әйгілі сәулетші лорд Норман Фостердің қиялынан туған бұл баламасыз архитектуралық өнер туындысы сәні мен салтанатын жарастырып келе жатқан Астана келбетіне айшықты көрініс беріп тұр. Ғимарат президент Резиденциясы мен үкіметтік ғимараттар кешенінен бастау алатын қаланың басты орталық белдеуін аяқтап тұр.

«Хан шатырды» британдық Foster & Partners фирмасы жобалаған болатын. Оның биіктігі 150 метрді құрайды, аумағы — 127 мың шаршы метр.

Тағы бір атап өтетін жайт, «Хан шатыр» — Forbes Style журналының нұсқасы бойынша әлемнің ең үздік он экоғимараттарының тізіміне енді. Мұндай құрметке ТМД елдерінен Қазақстан ғана лайықты болып отыр.

20 метр цемент іргетасқа орнатылған қаладағы ең биік және әлемдегі киіз үй пішіндес ең үлкен ғимараттың құрылысы кезінде пайдаланылған көптеген технологиялар мен материалдар теңдесі жоқ болып табылады, олардың кейбірі әлемдік тәжірибеде тұңғыш рет қолданылып отыр. 


Шатырдың ерекше қабаты оны Астана халқына үйреншікті болып кеткен боран мен аяздан қорғап, іште қысы-жазы қолайлы климат ұстап тұруға мүмкіндік береді. Әрдайым жайдарлы ауа-райы мен күн нұрының төгілуі –«Хан Шатырға» тән белгі болмақ. Түрлі климаттық белдеулерде өсетін жасыл-желектерді мұнда сатылы террасадан кездестіруге болады.

Ғимараттың орталығындағы кең алаң көрме және ойын-сауық шараларына арналған. 40 000 шаршы метр жайлы аумағы дәмхана, мейрамхана, кинотеатр мен дүкендерге берілген. Қаладағы сауда орталықтарының көптігінен жалға алушылар бұл жерге келмейді деген болжамдар жоққа шықты. Коммерциялық алаңдардың 82%-ы қазірдің өзінде бос емес.

Олардың арасында бүкіл әлемге таныс брэндтермен бір қатарда астаналықтарға ұнап үлгерген сауда маркалары да кездеседі. Сауда мен қызмет көрсету нысандарынан басқа, осы жерде заман талабына сай фитнес орталығы, сұлулық салоны және т.б. табуға болады. Ал мынау орталықта орналасқан «Тілек ағашы». Жетім балалардың тілегі жазылған конвертті ашқан адам оны міндетті түрде орындау керек.

«Хан шатырдағы» назар аударуға тұрарлық тағы да бір бұрыш — «Өнер галереясы». Сіз бұл жерде қазақстандық суретшілер мен қолөнершілердің тамаша туындыларының куәгері атанасыз.

Тропикалық су бағы мен алыс Мальдив аралдарынан арнайы әкелінген жұмсақ құм төселген керемет жағажай — орталықтың ең қызықты орындарының бірі. Хауыздардың бірінде орналасқан жасанды толқын әсерлі көрініс береді. Осы жерде жылдың кез-келген мезгілінде тура Жерорта теңізінде демалып жатқандай сезімге бөленіп, рахат алуға болады.

«Хан шатыр» ойын-сауық орталығы — отбасыңызбен, балаларыңызбен келіп алаңсыз демалыс құруға таптырмас мекен. Сіздің қамыңыз үшін түрлі ойын құрылғылары мен сауық орталықтары ұйымдастырылған. Сонымен бірге мұнда саяхат жасайтын монорельсті темір жол, 7 және 4 метр биіктіктегі кедергілері бар суда жүзу орталықтары бар.

Ғимаратқа кіреберіс жерде «Хан шатырдың» толық макеті қойылған. Бұдан түсінеріміз ойын-сауық орталығы біздерді әлі де талай рет таң қалдыратын болады.

Нысан 2010 жылы шілде айының алтыншы жұлдызында ашылған болатын. 

 

Арнайы massaget.kz үшін: Айгерім Сматуллаева

 

http://massaget.kz/

Рубрика: