Sorry, this entry is only available in Казахский For the sake of viewer convenience, the content is shown below in the alternative language. You may click the link to switch the active language.

“МАЙМЫЛ ӘЙЕЛ” ӨЗ ЕЛIНДЕ ЖЕРЛЕНДI

ХIХ ғасырда әлемге “маймыл әйел” атымен белгiлi болған Юлия Пастра 1834 жылы дүниеге келген. Ол өте сирек кезде­сетiн екi дертпен ауырды. Оның бiрi – гипертрихоз едi. Сонымен қатар жағы пропорционалды емес, ал құлағы мен мұрны үлкен, маңдайы кiшкентай болды. Ол 16 жасынан бастап өле-өлгенше циркте қызмет еттi.
Юлия 1860 жылы Мәс­­кеу қаласында гастрольде жүргенде бала туу кезiнде қайтыс болды. Күйеуi бiрнеше жыл бальзамдалған әйелiн әйнектi табытқа салып, өзiмен бiрге алып жүр­ген.
Мексика мемлекетi не­ше жылдан берi Юлия Пастраның мүрдесiн елге қайтаруды сұраған едi. 1921 – 1950 жыл аралығында оның денесi Норвегияның көңiл көтеру паркiне қойылған болатын. Ал соңғы уақытта оның мүр­десiн жабық табытқа салып, Осло уни­вер­ситетiнiң анатомия кафедрасында ұстады. “Маймыл әйелдiң” мүр­десiн елiне жiберу туралы шешiм 2010 жылдың жазында қабылданған болатын. Сөйтiп, қайтыс болғанына 150 жыл өткен соң Юлия Пастраның бальзамдалған денесiн ақ табытқа салып, үстiн раушан гүлi­мен көмкерiп, мексиканың Синалоа-де-Лейва қаласына жер­ледi.
“Юлия Пастраның жерлеуiне көп адам қатысты, олардың iшiнде қаланың губернаторы Марио Лопес те болды”, – деп жазады Science World Report.
ЖАПОН АСПАЗШЫСЫ ТОПЫРАҚТАН ТАМАҚ ЖАСАЙДЫ
Жапонның аспазшысы Тосио Танабе – фран­цуз тағамдарын жасаудың кәсiби маманы. Бұрын ол боксшы болған, бiрақ Тосио спорттық карьерасын жиып қойып, кулинарияға бет қойды. Мiне, оның француз мейрамханасында жұмыс iстегенiне де 20 жылдай уақыт болыпты. “Осыдан 8 жыл бұрын Тосио Танабе мейрамханаға келген қонақтарға тағамның жаңа түрiн ұсынды”, – деп жазады Reuters.
Бас аспазшы Тосионың қонақтарға ұсынған тағамының жаңа түрi – топырақтан жасалады екен. Бiрақ ол топырақты кез келген жерден ала бермейдi. “Мен тамақ жасайтын топырақты көп iздедiм. Тауға да, тасқа да шықтым. Оны жемiс-жидек немесе көк­өнiс, бидай өсiп тұр­ған жерден алуға болмайды. Себебi ол жердегi топыраққа неше түрлi тыңайтқыш себiл­ген. Ал менiң тамағыма керегi – таза топырақ”, – дейдi бас аспазшы.
Тосио Танабе iзде­ген топырағын тапты. Оған күнiне бiр келiдей топырақ әкелiнедi. Арнайы технология арқылы одан қауiптi элемент­тердiң бар-жоғын тек­середi. Топыраққа тән иiсiн жояды, електен өткiзедi. Содан кейiн барып тамақ дайындауға кiрiседi. Бұрын Тосио Танабе топырақтан бiр-екi ғана тамақ дайындаушы едi, қазiр оның тағамының түрi көбейдi. Мейрамханаға келушiлер тек қана топырақтан iстелген көженi ғана iшпейдi, сонымен қатар топырақтан қуырыл­ған нанды да жейдi. Бас аспазшының қонақтарға ұсынатын және өзi мақтан тұтатын тағамы бар. Ол – жуылмаған картоп (оның iшiне майдаланған шоколад салынады).
Танабенiң мақтаған және ағзаға өте пайдалы деген топырақтан жасалған тағамдарына әркiм әртүрлi пiкiр айтады. “Көжеден топырақтың дәмi бiлiнгенiмен, кәдiмгi көкөнiстен жасалған кө­жеге ұқсайды. Маған өте ұнады”, – дейдi бiр жер­гiлiктi тұрғын. Дегенмен де көбiсi бас аспаздың бұл тағамдарына сақтықпен қарайды. “Баяғыда адамдар топырақ жеген, ал қазiр олар жиiркенедi” дейдi Танабе. Бас аспаздың бұл тағамдары – орта есеппен 100 доллардай болады.
http://zhasalash.kz

Рубрика: