АЛТЫНОРДА
Новости

Қазақстанды халифатқа айналдырғысы келетіндердің ісін қарау басталды

Нұрғиса ЕЛЕУБЕКОВ (фото)

Астана қаласының мамандандырылған ауданаралық соты кеше «террористік актілерді жүзеге асырмақ болды» деп айып тағылған күдіктілердің ісін қарауға кірісті. Алты адамнан тұратын топқа тағылған басты айып: қоғамға қауіп төндіріп, халықтың үрейін алу мақсатында жарылғыш заттар мен қару қолдана отырып жарылыстар әзірлеп, басқа да әрекеттерді жоспарлау. Күдіктілер террорлық топтарға қатысып, дүркін-дүркін лаңкестік әрекеттерді жүзеге асыру арқылы Қазақстанды халифатқа айналдыруды да көксегенге ұқсайды.

Ақпарат агенттіктерінің жазуынан бай­қағанымыз, кіл қаракөздерден тұратын кү­діктілер лаңкестік әрекетке бастан-аяқ әзір­ленген сыңайлы. Мәселен, жарылыс жа­сауға бел буған топ елордадағы Бей­біт­ші­лік және келісім сарайының, Астана опе­ра және балет театрының сызбаларын қол­ға түсірген. Мемлекеттік айыптаушы Мә­­лика Шашдәулетованың айтуынша, Қо­шалақов басқарған лаңкестік топ елдің жо­ғары лауазымды тұлғаларына қас­тан­дық ойластырып, Астанадағы Ұлттық қа­уіп­сіздік комитетінің ғимаратына ша­буыл­дауды жоспарлаған. «Бұл мақсатта айып­талушы Шәріпов өзінің кәмелетке тол­маған әйелі – Нұрғалиеваны үгіттеп, оны Астанадағы Опера және балет теа­трын­да жоғары лауазымды тұлғалардың қатысуымен өтетін театрдың ашылуында шахид ретінде өзін-өзі жарып жіберуге дайындаған», – деп келтіреді прокурордың сөзін ақпарат агенттіктері.

Ал айыптау қорытындыларына сү­йенсек, лаңкестік топ мүшелері бастапқыда «кәпірлерге» қарсы күш қолдана қылмыс жасап, олардың көзін жоя отырып, мүлік­терін иеленуді де ойластырған. Сосын қыл­мыстық жолмен табылған қаражаттың бір бөлігін Ресейдің Кавказ аймағына, сондағы террористік топтарға мате­риал­дық көмек ретінде жіберіп отыру жос­пар­ланған. Қаражаттың қалған бөлігіне қару-жарақ сатып алып, оны лаңкестік әрекеттер үшін қолдануға жоспарлапты. Сөйтіп, тергеу нәтижелері айыпталушы Қоша­лақов, Е.Кәдірсізов, А.Қасқабаев, С.Жү­нісов пен Шәріповтердің әңгімелерінен, пі­кір­лерінен қарулы жиһад түріндегі лаң­кестікті насихаттау, сондай-ақ тер­рор­лық әре­кетке шақыруларды анықтаған. Мә­се­лен, айыптау қорытындысы бойынша Қо­шалақов пен Шәріпов 2012 жылдың қыр­күйегінде Астанадағы Р.Қошқарбаев кө­шесіндегі мешіт жанынан дөнерхана ашып, соған келімді-кетімді жұртшылықты әңгімеге тарта жүріп, Қазақстан аумағында лаңкестік әрекеттер жасау үшін өздеріне қосыла алатын адамдарды да іздестірген көрінеді. Осылайша, 2012 жылы олар Астана тұрғындары Е.Кәдірсізов, А.Қас­қабаев, С.Жүнісов деген азаматтарды ірік­теп алады. Біртіндеп лаңкестік әрекеттерге бой ұрған топ мүшелері жарылыс ұйым­дастыру мақсатында Бейбітшілік және ке­лісім сарайының сұлбасын қолға түсірген. Тер­геу барысында топ мүшелері 19 жел­тоқ­санда қолдан жасалатын жарылғыш қон­дырғы мәселесін талқылағаны да бел­гілі болыпты. Ал мұндай мәліметтерді олар «Лаң­кестік әліппесі» атты кітапшадан ал­ған­ға ұқсайды. Күдіктілер қопарғыш қон­дырғы жасау үшін қажетті керек-жарақты да сатып алған. Әлгі кітапша да, жарылғыш затқа қажетті керек-жарақ та күдіктілердің пәтерін тінту барысында тәркіленген.

Бұдан басқа, күдіктілер «Астаналық ба­зар» сауда үйінен әшекей бұйымдар ұр­лауды жоспарлаған. Олар сауда үйінің жұ­мыс кестесін зерттеп, бейне-бақылау ка­мераларын анықтап, із суыту жолдарын да алдын ала пысықтаған. «Топ мүшеле­рінің біреуі сауда үйі жабылғанда сонда жал­ға алынған бутикте тығылып қалуы тиіс болатын. Одан соң дәнекерлеуші ап­па­ратпен, шыны кескішпен, бұран­да­ғышпен сейфтен зергерлік бұйымдарды ұр­лау көзделеді. Сосын қайтадан бутикке жасырынып, таңертең күзетшінің киімімен сауда үйінен сытылып кетуі тиіс болған», – деді прокурор. Оның айтуынша, 2012 жылдың желтоқсанында қылмыстық әре­кеттерін жүзеге асыру мақсатында топ мүшелері аталған сауда үйінің екінші қа­батынан бутик жалдаған. Орталық ба­зардан «Күзет» киімінің екі формасын, екі жол­қапшық пен тағы басқа қажетті ас­паптар сатып алынған. Террористік топ мү­шелері қылмысты 2012 жылы 31 жел­тоқсаннан 2013 жылғы 1 қаңтарына қа­раған түні жүзеге асырмақ болып уағ­даласады. Соған орай, 31 желтоқсанда Әб­дікеров пен Шәріпов «Астаналық ба­зар» сауда үйіне келеді де, Әбдікерімов дүң­гіршектің сөрелерінің астына жа­сырынып, Шәріпов бутикті жауып кетеді. 1 қаң­тарда түнгі 1-лер шамасында Әб­ді­ке­ровті Ұлттық қауіпсіздік комитетінің қыз­меткерлері тұтқындаған.

Сот отырысы әлі де жалғасатын бо­лады.

Автор: Қанат ҚАЗЫ, Астана

http://alashainasy.kz/politics/42704/