Қазақ спортының тарихында Олимпиада чемпионы, тіпті жүлдегері болған қазақ қызы жоқ. Тәуелсіздігімізге қол жеткізіп, дербес мемлекет ретінде бес рет қысқы Олимпиада ойындарына, бес мәрте жазғы Олимпиада ойындарына қатыстық. Өкінішке қарай, әлі бірде-бір қазақ қызы Олимпиада жүлдесіне қол жеткізген жоқ.
Рас, 2010 жылы тұңғыш рет Сингапурде өткен жасөспірімдер арасындағы Олимпиада ойындарында ауыр атлет аруымыз Жазира Жаппарқұл саф алтынды өңірінде жарқыратып (суретте), жеңіс тұғырының ең биік сатысына көтерілген. Яғни Олимпиада чемпионы атанған. Бірақ бұл – жас жеткіншектер арасындағы Олимпиада.
Бірақ Олимпиада ойындарына қатысып жүрген қыздарымыз жетерлік. Тіпті қазағы аз қысқы спорт түрлерінде де Ақ Олимпиадаға қатысқан қыздарымыз баршылық. Бұл орайда бірінші кезекте конькиші аруымыз Кенжеш Сәрсекенованы атап өтуге тиіспіз. Ол 1994 жылы Лиллехаммердегі (Норвегия), 1998 жылы Наганодағы (Жапония) Олимпиада ойындарына қатысқан. Одан кейін де Олимпиада ойындарына қатысқан қыздарымыз баршылық. Шайбалы хоккейден Динара Диқанбаева Солт-Лейк-Ситиде, фристайлдан Жібек Арапбаева Ванкуверде ел намысын қорғады.
Ал жазғы Олимпиада ойындарына қатысқан қазақ қыздары біршама. Солардың ішінде Олимпиада жүлдегері атанудан мүмкіндіктері мол болған көркем гимнасшы Әлия Юсупова мен құралайды көзге атқан мерген Зәуреш Байбосынованы ерекше атап өтуге болады. Соңғы екі Олимпиадада таэквондошы қыздарымыздан жүлде күткенбіз. Алайда әзірше қазақ қыздарының төрт жылда бір өтетін дүбірлі додада бағы жанбай келеді. Бірақ біз қыздарымыздың Олимпиада ойындарынан жүлде алатынына сенімдіміз.
Қазақ қыздарынан тұңғыш Олимпиада чемпионы және жүлдегері ауыр атлетикадан шыға ма, жоқ таэквондошы аруларымыздың бірі бола ма, оны уақыт көрсетер. Бәлкім, боксшы немесе балуан қыздарымыздың бірі болып ел спорты тарихына өз есімін алтын әріптермен жазар. Бәрін де алдағы уақыт көрсетеді. Әлеуеті зор қыздарымыздың барлығын тізіп шықпасақ та, Жазира Жаппарқұл, Анна Нұрмұханбетова (ауыр атлетика), Гүлнафиз Айтмұхамбетова, Феруза Ергешова (таэквондо), Гүлжан Иссанова (дзюдо), Саида Хасенова, Дариға Шәкімова (бокс) бастаған халықаралық додаларда айрықша көзге түсіп жүрген аруларымыздың бар екенін айта кету ләзім.
Осы ретте шахматшы қыздарымызға айрықша көңіл бөлгіміз келеді. Тап осы күндері Астанада шахматтан командалық әлем чемпионаты өтуде. Қазақстан құрамасының намысын өрімдей жас бес қарындасымыз қорғауда. Біле білсек, әзірше ешбір спорт түрінде құрамы тек қазақ жастарынан жасақталған ұлттық құрамамыз жоқ (бұл жерде қазақ күресі, тоғызқұмалақ секілді ұлттық спорт түрлерін есепке алып отырған жоқпыз). Әрі шахматшы қыздарымыз – осы әлем чемпионатына қатысып жатқан ең жас құрама. Жас та болса біздің қыздарымыз 64 тор көзді тақта үстінде әлемнің таңдаулы құрамаларымен терезесі тең өнер көрсетуде. Халықаралық гроссмейстерлер – Гүлісхан Нақбаева мен Динара Сәдуақасова, халықаралық шахмат шеберлері – Мадина Дәулетбаева, Гүлмира Дәулетова және жас талант Жансая Әбдімәлік күллі қазақтың мақтанышы десек, асыра сілтегеніміз емес. Шеберліктерін шыңдай түскен соң осы қыздарымыз бен олардың ізін басқан жас бүлдіршіндеріміз шахмат әлеміне үстемдік құрады деп үміттенеміз.
Ұлттық спорт түрлерінде де абыройымызды асқақтатып жүрген қарындастарымыз бар. Бұл ретте Әсел Далиеваны (тоғызқұмалақ) ілтипатпен атап өткіміз келеді.
Ендеше, күні бүгінге дейін қазақ қыздарынан шыққан Олимпиада чемпионы мен жүлдегері жоқ деп жасымайық. Ештен кеш жақсы. Әлі-ақ қыздарымыздың жүлделерін санаудан жаңылысатын күн туар. Үйіп-төгіп бір-ақ беріп, жүлделер де, қуанышымыз да қойнымызға сыймай, мәре-сәре болатын күнге жазсын.
Автор: Нұрғазы САСАЕВ
http://alashainasy.kz/sport/40995/
